tan-e-be-jāñ meñ ab rahā kyā hai

dekhiye marzi-e-ḳhudā kyā hai

apnī hālat pe aaj rotā hai

dil-e-dīvāna ko huā kyā hai

ai tabībo tumheñ ḳhudā kī qasam

sach batā do ki mājrā kyā hai

maiñ ḳhatāvār hī sahī lekin

sun to lo pahle mājrā kyā hai

na khulā aaj tak kisī par bhī

ḳhat-e-taqdīr meñ likhā kyā hai

kyuuñ ye chup chup ga.e adam vaale

yā-ilāhī ye mājrā kyā hai

lab-e-zaḳhm-e-jigar to hañste haiñ

tū ne ai baḳhiya-gar siyā kyā hai

dil to kyā jaan ishq meñ de dī

ye na pūchhā ki mudda.ā kyā hai

uTh ke pichhle se aahoñ kā bharnā

'shauq' terā ye mashġhala kyā hai