toḌ sako tum shāḳh se mujh ko aisī to maiñ kalī nahīñ huuñ
rok sako tum merī rāheñ itnī uthlī nadī nahīñ huuñ
merī bāteñ sīdhī-sādī makkārī se bhare hue tum
mere paas to sachchā.ī hai jhūT-kapaT se bañdhī nahīñ huuñ
bune haiñ maiñ ne apne sapne ḳhud hī apnī raah banā.ī
raah se tum bhaTkā do mujh ko niiñd meñ aisī ghirī nahīñ huuñ
nīl-gagan hai merī tāqat dhartī mujh ko thāme rakhtī
koī āñdhī mujhe uḌaa.e tinkoñ kī maiñ banī nahīñ huuñ
tum bhī zulm kahāñ tak karte maiñ bhī unheñ kahāñ tak sahtī
tum bhī itne bure nahīñ ho maiñ bhī aisī bhalī nahīñ huuñ