mohlat na milī ḳhvāb kī ta.abīr uThāte
ham maare ga.e TuuTe hue tiir uThāte
māmūr thiiñ sūraj kī gavāhī pe havā.eñ
phir saa.e kahāñ dhuup kī jāgīr uThāte
tujh tak bhī pahuñchne ke liye vaqt nahīñ thā
kab daulat-e-duniyā tire rah-gīr uThāte
bas ek hī ḳhvāhish sar-e-maqtal hameñ yaad aa.ī
zindāñ se nikalte hue zanjīr uThāte
us vaqt bhī hāthoñ ne qalam ko nahīñ chhoḌā
jab in pe zarūrī thā ki shamshīr uThāte
ham log 'salīm' asal se kaT kar nahīñ jiite
kyā soch ke āḳhir koī tasvīr uThāte