abhī jo gardish-e-ayyām se milā huuñ maiñ
samajh rahī thī kisī kaam se milā huuñ maiñ
shikast-e-shab tirī taqrīb se zarā pahle
diye jalātī huī shaam se milā huuñ maiñ
ajal se pahle bhī miltā rahā huuñ par ab ke
baḌe sukūñ baḌe ārām se milā huuñ maiñ
tirī qabā kī mahak har taraf numāyāñ thī
havā-e-vādī-e-gul-fām se milā huuñ maiñ
maiñ jāntā huuñ makīnoñ kī ḳhāmushī kā sabab
makāñ se pahle dar-o-bām se milā huuñ maiñ
'salīm' naam batāyā thā ġhāliban us ne
kal ek shā.er-e-gum-nām se milā huuñ maiñ