vo mire ġham kā mudāvā nahīñ hone detā
zarra-e-dard ko sahrā nahīñ hone detā
saath rakhtā huuñ hamesha tirī yādoñ kī dhanak
maiñ kabhī ḳhud ko akelā nahīñ hone detā
zaḳhm bhartā hai nayā zaḳhm lagāne ke liye
kyā masīhā hai ki achchhā nahīñ hone detā
jis ke anjām se TuuTe mirā pindār-e-anā
maiñ vo āġhāz dobāra nahīñ hone detā
rok detā huuñ umaDte hue tūfāñ 'nāsir'
qatra-e-ashk ko dariyā nahīñ hone detā