huī dastak koī aayā nahīñ koī nahīñ hai
hameñ ab pūchhne vaalā kahīñ koī nahīñ hai
bahut ābād haiñ ye be-dar-o-dīvār se ghar
mahal aise bhī haiñ jin meñ kamīñ koī nahīñ hai
jhijakte haiñ ishāroñ se bhī dil kī baat karte
ki shīsha-ghar meñ rāzoñ kā amiiñ koī nahīñ hai
ab ik andhe kuñ.eñ meñ girte jaanā zindagī hai
ab apne paañv ke nīche zamīñ koī nahīñ hai
zarā sun to ki ab mazlūm nā-ummīd ho kar
ye kahte haiñ sar-e-arsh-e-barīñ koī nahīñ hai