qaid-e-shab-e-hayāt badan meñ guzār ke
uḌ jā.ūñgā maiñ sub.h aziyyat utaar ke
ik dhuup zindagī ko yuuñ sahrā banā ga.ī
aa.e na is ujaaḌ meñ mausam bahār ke
ye be-gunāh sham.a jalegī tamām raat
is ke laboñ se chhū ga.e the lab sharār ke
sīlan ko raah mil ga.ī dīmak ko sair-gāh
anjām dekh lījiye ghar kī darār ke
sajtī nahīñ hai tum pe ye tahzīb-e-maġhribī
ik to phaTe libās haiñ vo bhī udhār ke
bādal nahīñ huzūr ye āñdhī hai aag kī
āñkhoñ se dekhiye zarā chashma utaar ke
jab hathkaḌī ko toḌ ke kāfir huā farār
rote rahe asiir ḳhudā ko pukār ke