ghuTī ghuTī ḳhaak meñ dabī is sadā se aage
hai aur sharā-e-marg karb-o-balā se aage
mire masīhā talāsh kar dhaḌkanoñ ke jugnū
yahāñ vahāñ zindagī paḌī hai fanā se aage
nigal ga.ī hañste-kheltoñ ko palak jhapakte
sitamgarī meñ zamīñ baḌhī intihā se aage
unhīñ kī sāñsoñ ko le uḌe āñdhiyoñ ke rele
jo ūñchā uḌne kī chaah meñ the havā se aage
sharīk-e-ġham sab hue haiñ lekin ye vaqt vo hai
ki jis meñ darkār aur kuchh hai duā se aage
maiñ chhat tale pīTtī huuñ 'raḳhshanda' apne sar ko
ki ham-nafas nañge sar khaḌe haiñ ridā se aage