aks paanī meñ jal ga.e kitne
jugnuoñ se bahal ga.e kitne
kahkashāñ maañg meñ sañvarne lagī
rañg kājal meñ Dhal ga.e kitne
aa.e sab rāste mire ghar tak
āsmāñ tak nikal ga.e kitne
baat phailī shafaq kināroñ tak
chāñd-tāre ajal ga.e kitne
dhyān kā dar khulā to yādoñ ke
diip āñkhoñ meñ jal ga.e kitne
hote hote ye taur aam huā
girte girte sambhal ga.e kitne
vo bhī ḳhvāboñ ke ham-safar Thahre
qāfile ruḳh badal ga.e kitne
koī harf-e-duā huā bhī nahīñ
hādse jaañ se Tal ga.e kitne