va.ade mohabbatoñ ke kuchh aise nibhā.e haiñ
ham qatl hone kūcha-e-qātil meñ aa.e haiñ
ḳhushbū tire visāl kī phailī hai chaar sū
kin kin jag.hoñ pe tū ne Thikāne banā.e haiñ
aañsū lahū meñ Duub ga.e to ḳhabar huī
tūfān dil ne dard ke kyā kyā uThā.e haiñ
terī mohabbatoñ ke nashe bhī ajiib haiñ
ham hosh meñ the phir bhī qadam laḌkhaḌā.e haiñ
pakke makāñ kī vahshatoñ ko dekh dekh kar
ab ham ne ḳhvāhishoñ ke gharauñde banā.e haiñ
ye zindagī kisī kī amānat hai dosto
gin ke batāo jitne bhī lamhe gañvā.e haiñ
shām-e-ġharībāñ tum ne to dekhī nahīñ kabhī
bas is ḳhayāl se hī tumheñ dukh sunā.e haiñ