aa jaatā hai ḳhud paas bulānā nahīñ paḌtā

milne ke liye haath baḌhānā nahīñ paḌtā

kuchh aisī suhūlat se makīñ dil meñ huā vo

mujh ko bhī mirī zaat se jaanā nahīñ paḌtā

ye ḳhaas ri.āyat hai ki ab des meñ apne

ġham muft meñ miltā hai kamānā nahīñ paḌtā

is shahr se us shahar talak sīdhī saḌak hai

filhāl to raste meñ zamāna nahīñ paḌtā

afsāna-e-hastī bhī bahut ḳhuub hai jis meñ

kirdār koī sā bhī nibhānā nahīñ paḌtā

ik karb-e-musalsal ki mirā pahlū-nashīñ hai

ik lutf-e-darūñ jis ko gañvānā nahīñ paḌtā

ab lohā ugāte haiñ daraḳhtoñ kī jagah ham

koyal ko bhī ab shor machānā nahīñ paḌtā