dil-e-muztar se nālāñ haiñ udhar vo bhī idhar ham bhī
mohabbat meñ pareshāñ haiñ udhar vo bhī idhar ham bhī
kise fursat hai maazī kī purānī dāstāñ chheḌe
ġham-e-hāzir meñ ġhaltāñ haiñ udhar vo bhī idhar ham bhī
ba-zāhir koī hairānī nahīñ tark-e-mohabbat par
magar dil meñ pashemāñ haiñ udhar vo bhī idhar ham bhī
ḳhizāñ ke jaur-e-paiham kī shikāyat hai to donoñ ko
talabgār-e-bahārāñ haiñ udhar vo bhī idhar ham bhī
unheñ jaane kī jaldī hai hameñ zid hai ki ruk jaa.eñ
ġharaz donoñ pareshāñ haiñ udhar vo bhī idhar ham bhī