mastī-e-bāda-e-gulfām se vābasta rahī
zindagī raqs-e-mai-o-jām se vābasta rahī
log kahte haiñ ki kuchh us meñ mirā zikr bhī thā
vo hikāyat jo tire naam se vābasta rahī
dil jo ghabrāyā to mai-ḳhāne meñ ham jā baiThe
har ḳhalish bāda-e-gulfām se vābasta rahī
us kī majbūrī-e-paiham pe zarā ġhaur kareñ
jo tamannā dil-e-nākām se vābasta rahī
'arsh' muddat huī go tark-e-mai-o-jām kiye
phir bhī tohmat ye mire naam se vābasta rahī