chashm-e-zāhir-bīñ ko har ik pesh-manzar āshnā
mil nahīñ saktā tujhe ab mujh se behtar āshnā
zarf terā mujh pe raushan ho gayā hai is tarah
jis tarah qatre se hotā hai samundar āshnā
TūTnā taqdīr us kī toḌnā us kā ḳhamīr
ġhair mumkin hai na ho shīshe se patthar āshnā
har tarah ke phuul haiñ dil kī zamīñ par dekhiye
kis tarah kah duuñ nahīñ siine se ḳhanjar āshnā
maiñ ne chaTTānoñ pe gul-būTe tarāshe haiñ bahut
aap kī nazreñ bhī hotīñ kaash manzar-āshnā
jāntā huuñ kaun kyā hai aap kyuuñ deñ mashvara
maiñ luTeroñ se bhī vāqif aur rahbar-āshnā