aaj bhī terī hī sūrat hai muqābil mere
ye bhī ik ishq kā andāz hai qātil mere
terā mahrūm-e-mohabbat huuñ so vāpas na gayā
be-mohabbat kabhī dar se koī saa.il mere
husn-e-bīmār tujhe phuul diye haiñ maiñ ne
in meñ hone the magar zaḳhm bhī shāmil mere
aur maiñ huuñ ki safar phir bhī kiye jaatā huuñ
saa.e kī tarah ta.āqub meñ hai manzil mere
maiñ samundar ke talātum se bhī kuchh sīkhtā huuñ
isī taqsīr pe dushman hue sāhil mere
aaj ārā.ishī zanjīr hai gardan meñ 'kamāl'
kabhī hathiyār gale meñ the hamā.il mere