inkār hī kar dījiye iqrār nahīñ to
uljhan hī meñ mar jā.egā bīmār nahīñ to
lagtā hai ki pinjre meñ huuñ duniyā meñ nahīñ huuñ
do roz se dekhā koī aḳhbār nahīñ to
duniyā hameñ nābūd hī kar Dālegī ik din
ham hoñge agar ab bhī ḳhabar-dār nahīñ to
kuchh to rahe aslāf kī tahzīb kī ḳhushbū
Topī hī lagā lījiye dastār nahīñ to
ham barsar-e-paikār sitamgar se hamesha
rakhte haiñ qalam haath meñ talvār nahīñ to
bhaa.ī ko hai bhaa.ī pe bharosa to bhalā hai
āñgan meñ bhī uTh jā.egī dīvār nahīñ to
be-sūd har ik qaul har ik sher hai 'rāġhib'
gar us ke muāfiq tirā kirdār nahīñ to