zaḳhm-e-dil tujh se maiñ chhupā.ūñ kyā
dard sah kar bhī muskurā.ūñ kyā
ho ijāzat to terī mahfil meñ
apnī qismat ko āzmā.ūñ kyā
kyuuñ ishāroñ meñ kah rahā hai tū
saaf kah de ki bhuul jā.ūñ kyā
yuuñ to ye daur hai latīfoñ kā
tum kaho to ġhazal sunā.ūñ kyā
aish-o-ishrat ke vāste ai dil
daav īmān kā lagā.ūñ kyā
sab kā kirdār jo sajātā hai
aa.ina vo tujhe dikhā.ūñ kyā
roTī kapḌā makāñ mile sab ko
ḳhvāb aise 'asar' sajā.ūñ kyā