maiñ jāntā huuñ ḳhushāmad-pasand kitnā hai
ye āsmān zamīñ se buland kitnā hai
tamām rasm uThā lī ga.ī mohabbat meñ
diloñ ke biich magar qaid-o-band kitnā hai
jo dekhtā hai vahī boltā hai logoñ se
ye aa.ina bhī haqīqat-pasand kitnā hai
tamām raat mire saath jāgtā hai koī
vo ajnabī hai magar dard-mañd kitnā hai
maiñ us ke baare meñ akasr ye sochtā huuñ 'shakīl'
khulā huā hai vo itnā to band kitnā hai