nadī kā aab diyā hai to kuchh bahāv bhī de

mirī ġhazal ko nayā-pan bhī de rachāv bhī de

chalā ke sard havā mujh ko munjamid bhī kar

pighal ke phailnā chāhūñ to ik alaav bhī de

ki jis ke dard kā ehsās tere jaisā ho

kabhī kabhī mirī fitrat ko aisā ghaav bhī de

azāb-e-sail-e-musalsal jo de rahā hai mujhe

to sat.h-e-āb pe chalne ko ek naav bhī de

musāfirat ke ka.ī marhale tamām hue

ki merī ḳhāna-badoshī ko ab paḌāv bhī de