mujh ko bhī us se ishq thā ulfat ġhazab kī thī
us ko bhī mujh haqīr se chāhat ġhazab kī thī
vo laḌkī jo nasīb pe rotī thī raat bhar
galiyoñ meñ us ke husn kī shohrat ġhazab kī thī
hañste hue laboñ ko vo halke se kāTnā
vallāh us hasīn kī aadat ġhazab kī thī
jaane se us ke baaġh meñ aalam ḳhizāñ kā thā
sūkhe guloñ meñ qaid vo vahshat ġhazab kī thī
ḳhanjar raqīb kā thā to tadbīr dost kī
maqtal meñ 'zoyā' yaar kī shirkat ġhazab kī thī