misre ke vast meñ khaḌā huuñ
shāyad maiñ andhā ho gayā huuñ
so.e hue biij jaag jaa.eñ
khetoñ meñ ashk bo rahā huuñ
dahlīz ke paas se kisī ke
pheñke hue ḳhvāb chun rahā huuñ
bistar meñ raat so rahī hai
maiñ tere huzūr jāgtā huuñ
saarī murda mohabbatoñ ko
hairat se chhū ke dekhtā huuñ
TuuTī huī raqam kī tarah se
bekār meñ ḳharch ho gayā huuñ
bhūlā huuñ samundaroñ pe chalnā
galiyoñ meñ Dūbne lagā huuñ
talvār par naqsh khod kar kyā
qātil se daad chāhtā huuñ
bahrūp badal liyā hai tū ne
maiñ bhī to tamāshā ban gayā huuñ