uljhā us kī diid meñ

paḌā rahā tamhīd meñ

bhuul gayā is baar bhī

asar nahīñ tākīd meñ

sīkhā man ko mārnā

afsar kī tā.īd meñ

rahnā pal pal dhyān meñ

milnā iid ke iid meñ

nāma-bar likhvā.egā

tujh se naam rasīd meñ

us kī shakl utaar luuñ

gar aa jaa.e kashīd meñ

kāñch tarāshūñ baiTh kar

hiire kī taqlīd meñ

DhūñD ḳhudā insān se

murshid dekh murīd meñ

sifr anā ko maan kar

miT jaao tauhīd meñ

mujhe musavvir mil gayā

chhupā huā tajrīd meñ

Dhālā ek junūn ne

qatra marvārīd meñ

kuchh be-himmat dhartiyāñ

jaḌī rahīñ ḳhurshīd meñ

kyuuñ aatā hai lauT kar

vahī qadīm jadīd meñ

vāhid ko isrār hai

kyuuñ itnā tauhīd meñ