mohabbat se tirī yādeñ jagā kar so rahā huuñ
maiñ aadhī raat ko ḳhushbū lagā kar so rahā huuñ
sunā hai jab se tū ne raat āñkhoñ meñ basar kī
maiñ bistar kī jagah kāñTe bichhā kar so rahā huuñ
maiñ dariyā huuñ mirī gahrā.ī poshīda hai mujh meñ
giraft-e-ḳhāk se dāman chhuḌā kar so rahā huuñ
vo ghar meñ hai magar kahtā hai koī ghar nahīñ hai
to maiñ bhī aaj vīrāne meñ jā kar so rahā huuñ
nahīñ hai dastaras meñ ab zamīñ kā koī TukḌā
so maiñ kāġhaz pe apnā ghar banā kar so rahā huuñ
vo ḳhvāhish jis ko siine se abhī lipTā rahā thā
isī ko apne pahlū se haTā kar so rahā huuñ