darīcha aa.ine par khul rahā hai
mujhe apne se bāhar jhāñknā hai
akelā TuuTī kashtī par khaḌā huuñ
kinārā duur hotā jā rahā hai
use pahchānñā āsāñ nahīñ jo
havā kā rañg paanī kā maza hai
kahīñ andar hī TuuTe hoñge alfāz
abhī tak terā lahja chubh rahā hai
vo apne dostoñ ke darmiyāñ hai
yā mere dushmanoñ meñ ghir gayā hai
kisī ne aa.ine par hoñT rakh kar
achānak shauq ko bhaḌkā diyā hai
ḳhudā-e-lam-yazal tere liye to
jo honā thā vo goyā ho chukā hai
vo kaise āzmā.egā kisī ko
jo pahle hī se sab kuchh jāntā hai