insāñ havas ke rog kā maarā hai in dinoñ
be-laus rabt kis ko gavārā hai in dinoñ
dil ab mirā dimāġh ke taabe hai is liye
jiinā tire baġhair gavārā hai in dinoñ
mahrūmiyoñ ko maan ke taqdīr kā likhā
dil se ġhamoñ kā bojh utārā hai in dinoñ
mauzūñ hai vaqt āmad-e-tūfān ke liye
kashtī se merī duur kinārā hai in dinoñ
kūche meñ zindagī ke talāsh-e-sukūn meñ
ik yug bhaTak ke maiñ ne guzārā hai in dinoñ