vo be-gunāhī hamārī muaaf kartā hai
na faisla hī hamāre ḳhilāf kartā hai
sajā.e rakhtā hai ḳhvāb-o-ḳhayāl kī duniyā
haqīqatoñ kā vo kab e'tirāf kartā hai
ye ech-pech agar aur magar ye tāvīleñ
jo sāf-dil ho vo bāteñ bhī saaf kartā hai
jo apnī ruuh ke asrār se nahīñ vāqif
vo mere baare meñ kyā inkishāf kartā hai
jo hukm bhī huā sādir bas us ko maan liyā
'sa.īd' dil se kahāñ iḳhtilāf kartā hai