surma.ī shaam hai mausam hai suhānā aanā
is se pahle ki maiñ ho jā.ūñ fasāna aanā
mujh se pahle hī ka.ī log ḳhafā rahte haiñ
mujh se jal jaa.e zarā aur zamāna aanā
ik tirā husn gulāboñ sā ġhazal sūrat hai
ik ye sāvan kā mahīna hai suhānā aanā
roz kahte ho mujhe aaj to ye hai vo hai
aaj duniyā se koī kar ke bahāna aanā
āḳhirī jañg maiñ laḌne ke liye niklā huuñ
phir rahe yā na rahe terā divāna aanā
log kahte haiñ tujhe bhuul ke bhī zinda rahūñ
maiñ ne pūchhā thā magar dil nahīñ maanā aanā
log to log haiñ jo chāhe vo kah sakte haiñ
tū to merā hai mire dil ko dukhā na aanā
tū bhī shamshīr-e-badan mast-adā tīr-e-nigāh
maiñ bhī baiThā huuñ ki ho jā.ūñ nishāna aanā
dushman-e-jān samajhtā hai ki tanhā huuñ maiñ
maiñ ne dushman ko batānā hai ki nā nā aanā
muskurātā huuñ magar Dar hai kisī mahfil meñ
ashk āñkhoñ se na ho jaa.eñ ravāna aanā
vo jo ma.asūm sā shā.ir hai 'mubārak' 'ahmad'
us kā duniyā meñ faqat tū hai ḳhazāna aanā