kabhī kabhī mujhe itnā bhī tū nibhāyā kar
ki apne aap ko kuchh der bhuul jaayā kar
na chhat pe chāñd Tikegā na raat Thahregī
har ek ḳhvāb ko āñkhoñ meñ mat sajāyā kar
maiñ chāhtī huuñ ki har ruup meñ tujhe dekhūñ
kabhī kabhī mirī bātoñ se tañg aayā kar
tirī pasand kī ġhazleñ maiñ likh to duuñ lekin
ye shart hai ki unheñ hī tū gungunāyā kar
maiñ kashtiyoñ kī kahānī tujhe sunā.ūñgī
tū sāhiloñ kī kahānī mujhe sunāyā kar
maiñ apne aap se milne ko bhī taras jā.ūñ
mire vajūd meñ itnā bhī mat samāyā kar