phuul sab ke liye mahakte haiñ
log lekin kahāñ samajhte haiñ
zindagī jī rahe haiñ ham lekin
zindagī ke liye taraste haiñ
vaqt kā ek naam aur bhī hai
log marham bhī is ko kahte haiñ
roz milte nahīñ haiñ ham ḳhud se
roz ḳhud se magar bichhaḌte haiñ
phuul jaise jo khil nahīñ paate
phuul jaise vahī bikharte haiñ
vaqt meñ ḳhāsiyat hai kyā aisī
vaqt ke saath sab badalte haiñ