hogā kisī ke husn kā saudā yahīñ kahīñ
yūsuf ḳharīd legī zuleḳhā yahīñ kahīñ
shāyad idhar udhar paḌī hoñ ab bhī kirchiyāñ
TuuTā thā āñkhoñ kā koī sapnā yahīñ kahīñ
ahl-e-junūñ ke naqsh-e-kaf-e-pā yahāñ pe haiñ
honā to chāhiye koī sahrā yahīñ kahīñ
hairat hai dekh kar ki jahāñ uḌ rahī hai ḳhaak
bahtā thā mere ḳhvāb kā dariyā yahīñ kahīñ
ḳhushbū usī kī aaj fazāoñ meñ hai ghulī
ummīd hai 'suman' ki vo hogā yahīñ kahīñ