ye taġhayyur rū-numā ho jā.egā sochā na thā
us kā dil dard-āshnā ho jā.egā sochā na thā
nit na.e rāgoñ kī thī jis sāz-e-hastī se ummīd
vo bhī be-saut-o-sadā ho jā.egā sochā na thā
yuuñ sarāpā iltijā ban kar milā thā pahle roz
itnī jaldī vo ḳhudā ho jā.egā sochā na thā
vo ta.alluq jis ko donoñ hī samajhte the mazāq
is qadar bā-qā.edā ho jā.egā sochā na thā
jis 'sirāj'-e-ajmalī se thiiñ ummīdeñ be-shumār
vo bhī nazr-e-vāh-vā ho jā.egā sochā na thā