sahrā meñ zarra qatra samundar meñ jā milā
maiñ ḳhaak meñ milā to milā tujh ko kyā milā
ta.amīr dozaḳhoñ meñ ho shaddād kī bahisht
jannat ko chhoḌ aa.e to ġham dūsrā milā
ye to nahīñ ki ḳhvāb meñ duniyā badal ga.ī
bedār jab hue to tasavvur nayā milā
kyā kam haiñ ab bhī shahr meñ be-maġhz-o-be-libās
saudā thā ek sar meñ vo tan se judā milā
be-chārgī-o-ḳhvārī-o-darmāñdagī ke biich
mahtāb hans rahā thā gale ham se aa milā
ik jast meñ to koī na pahuñchā kamāl tak
ik umr sar khapā ke hī jo kuchh milā milā