vafā ke va.ade hue zindagī ke ḳhvāb hue
tumhāre ahd-e-karam meñ sabhī ḳharāb hue
badal ga.iiñ vo fazā.eñ tire badalte hī
mahakte ḳhvāb sulagte hue sarāb hue
mirī hayāt kī tārīkiyāñ simaT na sakīñ
bajā ke maah hue aap āftāb hue
maiñ sochtā huuñ ki vo log jaane kyā hoñge
jinhoñ ne pyaar kiyā aur kāmyāb hue
hamāre mel meñ qudrat kā haath shāmil hai
chalo maiñ ḳhaar sahī aap agar gulāb hue