hamārā ishq hai tafrīq īñ-o-āñ se buland
zamīñ-nashīñ haiñ magar haiñ ham āsmāñ se buland
bahār ḳhāk-ba-damāñ hai pastiyoñ meñ abhī
chaman agarche umīdoñ kā hai ḳhizāñ se buland
hayāt-e-qatra hai dariyā ke saath vābasta
vo uḌ gayā jo huā mauja-e-ravāñ se buland
ḳhirām-gāh-e-nigārāñ agar nahīñ na sahī
magar maiñ dil ko samajhtā huuñ kahkashāñ se buland
mazāq-e-ishq nahīñ pā-e-band-e-dair-o-haram
hamārā maslak-e-dīñ hai har āstāñ se buland
'salām' hañstī huī bijliyoñ kā toḌ ye hai
ki āshiyāñ meñ raho fikr-e-āshiyāñ se buland