iid ho jaa.e abhī tālib-e-dīdāroñ ko
khol do zulf se gar chāñd se ruḳhsāroñ ko
le ke dil chain se jā baiThe vo ghar meñ chhup ke
ab to āñkheñ bhī tarasne lagīñ nazzāroñ ko
phal ye qātil ko diyā merī girāñ-jānī ne
toḌ kar Dher kiyā saikḌoñ talvāroñ ko
ain altāf hai maz.hab meñ hasīnoñ ke sitam
bad-shugūnī hai unheñ pūchhnā bīmāroñ ko
daur-e-sāqī meñ bhī ulTī bahī gañgā har roz
jab diyā jām-e-mai-e-nāb to aġhyāroñ ko
kabhū saudā kabhū vahshat kabhū ġhaflat kabhū dard
aag lag jaa.e mohabbat ke in āzāroñ ko
vo parī-rū hai piyo shauq se tum ai 'tanvīr'
mai se parhez nahīñ chāhiye mai-ḳhvāro ko