yaas kī badlī yuuñ dil par chhā ga.ī
zindagī se zindagī uktā ga.ī
ranj-o-ġham to pahle hī kuchh kam na the
yaad terī kyuuñ hameñ taḌpā ga.ī
aap ne to jhūTā va.ada kar diyā
jaan muTThī meñ hamārī aa ga.ī
zindagī ye dekh kar us ke sitam
maut bhī insān se ghabrā ga.ī
dekh kar is daur kī ayyāriyāñ
kaañp uThā dil nazar tharrā ga.ī
sar uThāyā jab ta.assub ne 'shafaq'
ādamiyat kī tabāhī aa ga.ī