mohabbat kā jise saudā huā hai
na jaane kyā se kyā vo ho gayā hai
tirā dīvāna manzil pā gayā hai
junūn-e-āshiqī kaam aa gayā hai
kahīñ bhī dil nahīñ lagtā hamārā
na jaane ham ko ye kyā ho gayā hai
zamāne bhar kī ḳhushiyoñ kā hai hāmil
vo ġham jo terī ulfat ne diyā hai
miTā kar apnī ḳhushiyoñ kī bahāreñ
tire dāman ko ḳhushiyoñ se bharā hai
'shafaq' kuchh to batā de kaun hai vo
tire sheroñ meñ jo simTā huā hai