ham to kahte the dam-e-āḳhir zarā sustā na jā

le, chale ham jaan se, muḳhtār hai ab jā na jā

le dil-e-betāb aatā hai vo kar le arz-e-hāl

dekhte hī us kī sūrat is qadar ghabrā na jā

tañg ho kar kis adā se vasl kī shab ko vo shoḳh

mujh se kahtā thā ki he he is qadar lipTā na jā

paas aanā gar nahīñ manzūr to aa aa ke shakl

az-rah-e-shoḳhī mujhe tū duur se dikhlā na jā

jā.ūñ jā.ūñ kyā kahe hai bas laḌā.ī ho chukī

pyaar se mere gale ab jān-e-jāñ lag jā na jā

kyā samāñ rakhtā hai vo mahfil se uThnā yaar kā

aur ishāroñ se mirā kahnā ki aa jānā, na jā

kahte haiñ aatā hai vo ai jaan bar-lab-āmada

tū ḳhudā ke vāste Tuk aur bhī rah jā na jā

ruuTh kar jab mujh se vo jaatā hai to kar zabt-e-āh

pahle to kahtā huuñ maiñ ''tū jaan ab jā yā na jaa''

lek uTh kar jab vo jaatā hai to be-tābī se maiñ

vuuñ hī kahtā huuñ ''tire qurbān jā.ūñ aa, na jaa''

loTtā hai 'jur.at'-e-betāb jaane se tire

yuuñ use taḌpā ke tū ai shoḳh-e-be-parvā, na jā