shāyad kisī balā kā thā saaya daraḳht par

chiḌiyoñ ne raat shor machāyā daraḳht par

mausam tumhāre saath kā jaane kidhar gayā

tum aa.e aur bor na aayā daraḳht par

dekhā na jaa.e dhuup meñ jaltā huā koī

merā jo bas chale karūñ saaya daraḳht par

sab chhoḌe jā rahe the safar kī nishāniyāñ

maiñ ne bhī ek naqsh banāyā daraḳht par

ab ke bahār aa.ī hai shāyad ġhalat jagah

jo zaḳhm dil pe aanā thā aayā daraḳht par

ham donoñ apne apne gharoñ meñ muqīm haiñ

paḌtā nahīñ daraḳht kā saaya daraḳht par