itnā āsāñ nahīñ masnad pe biThāyā gayā maiñ

shahr-e-tohmat tirī galiyoñ meñ phirāyā gayā maiñ

mere hone se yahāñ aa.ī hai paanī kī bahār

shāḳh-e-girya thā sar-e-dasht lagāyā gayā maiñ

ye to ab ishq meñ jī lagne lagā hai kuchh kuchh

is taraf pahle-pahal gher ke laayā gayā maiñ

ḳhuub itnā thā ki dīvār pakaḌ kar niklā

us se milne ke liye sūrat-e-sāya gayā maiñ

tujh se kuchh kahne kī himmat hī nahīñ thī varna

ek muddat tirī dahlīz tak aayā gayā maiñ

ḳhalvat-e-ḳhās meñ bulvāne se pahle 'tābish'

aam logoñ meñ bahut der biThāyā gayā maiñ