un ko rusvā mujhe ḳharāb na kar
ai dil itnā bhī iztirāb na kar
āmad-e-yār kī ummīd na chhoḌ
dekh ai aañkh mail-e-ḳhvāb na kar
mil hī rahtī hai mai-parast ko mai
fikr-e-nā-yābi-e-sharāb na kar
nāsehā ham kareñge sharh-e-junūñ
dil-e-dīvāna se ḳhitāb na kar
shauq yāroñ kā be-shumār nahīñ
sitam ai dost be-hisāb na kar
dil ko mast-e-ḳhayāl-e-yār banā
lab ko ālūda-e-sharāb na kar
rakh bahar-hāl shuġhl-e-mai 'hasrat'
is meñ parvā-e-sheḳh-o-shāb na kar