jis ne tujh husn par nigāh kiyā

nūr-e-ḳhurshīd farsh-e-rāh kiyā

haq ne apne karam satī muj kuuñ

mulk-e-ḳhūbī kā pādshāh kiyā

mashq-e-ġhaflat se tīra-bātin ne

safha-e-zindagī siyāh kiyā

hauz-e-kausar kā tishna-lab kab hai

is zanaḳhdāñ kī jis ne chaah kiyā

kūcha-e-zulf meñ gayā jab dil

barg-e-sumbul kuuñ zād-e-rāh kiyā

barq-e-ḳhirman hai jān-e-dushman kā

dard siiñ jis ne ek aah kiyā

mat jalā ab 'sirāj' kuuñ zālim

shola-e-ġham kuuñ uzr-ḳhvāh kiyā