aql se hāsil huī kyā kyā pashīmānī mujhe
ishq jab dene lagā tālīm-e-nādānī mujhe
ranj degī bāġh-e-rizvāñ kī tan-āsānī mujhe
yaad aa.egā tirā lutf-e-sitam-rānī mujhe
merī jānib hai muḳhātib ḳhaas kar vo chashm-e-nāz
ab to karnī hī paḌegī dil kī qurbānī mujhe
dekh le ab kahīñ aa kar jo vo ġhaflat-shi.ār
kis qadar ho jaa.e mar jaane meñ āsānī mujhe
be-naqāb aane ko haiñ maqtal meñ vo be-shak magar
dekhne kaahe ko degī merī hairānī mujhe
saiñkaḌoñ āzādiyāñ is qaid par 'hasrat' nisār
jis ke baa.is kahte haiñ sab un kā zindānī mujhe