junūñ kā zikr mirā aam ho gayā to kyā
maiñ tere shahar meñ badnām ho gayā to kyā
koī usuul mirā matmah-e-nazar to rahā
shahīd-e-hasrat-e-nākām ho gayā to kyā
jahāñ ne kis ko sazāvār-e-āgahī jaanā
jo maiñ bhī morid-e-ilzām ho gayā to kyā
koī salīb pe laTkā kisī ne zahar piyā
mirā bhī gar yahī anjām ho gayā to kyā
hazār sham.eñ jalā kar ziyā bikher gayā
ḳhamosh maiñ jo sar-e-shām ho gayā to kyā
harīf-e-gardish-e-ayyām to rahā barsoñ
maiñ aaj kushta-e-ālām ho gayā to kyā