ġhair ke aage ye sar ḳham dekhiye kab tak rahe

be-hisī kā ab ye aalam dekhiye kab tak rahe

dost aur dushman ke chehre tā-ba-kai vāzeh na hoñ

diip kī lau itnī maddham dekhiye kab tak rahe

kab duā.eñ mustajab hoñ kab hamāre din phireñ

dil pareshāñ aañkh pur-nam dekhiye kab tak rahe

raushnī ke jashn meñ haa.el na the shab ke rafīq

chāñd taare aur shabnam dekhiye kab tak rahe

jo muharrik hai mire taḳhlīq-e-fan ke vāste

fikr meñ ye shiddat-e-ġham dekhiye kab tak rahe

kaise kaise sar-kashīda jhuk ga.e ik vaar se

haañ magar sīna-sipar ham dekhiye kab tak rahe

barf bhī pighlegī aur sūraj bhī chamkegā zarūr

sard-mehrī kā ye mausam dekhiye kab tak rahe