ik yaad thī kisī kī jo bādal banī rahī
sahrā-nasīb ke liye chhāñv ghanī rahī
vo naqsh huuñ jo ban ke bhī ab tak na ban sakā
vo baat huuñ jo kah ke bhī nāguftanī rahī
patthar kā but, samajh ki ye kis shai ko chhū liyā
barsoñ tamām jism meñ ik sansanī rahī
is jān-e-gul ko dekhte kaise ki aaj tak
ik rañg-o-bū kī sāmne chādar tanī rahī
vo dhund thī ki kuchh bhī dikhā.ī na de sakā
vo habs thā ki kaifiyat-e-jāñkanī rahī