ḳhvāb tumhāre aate haiñ
niiñd uḌā le jaate haiñ
aaj likheñge haal apnā
sochte haiñ Dar jaate haiñ
ishq bahut sachchā hai ham
taare toḌ ke laate haiñ
rusvā.ī kā ḳhauf nahīñ
shohrat se ghabrāte haiñ
naam tumhārā aatā hai
yādoñ meñ kho jaate haiñ
dil meñ dard sā uThtā hai
dard meñ Duube jaate haiñ
us kā dhyān jab aatā hai
ek sukūn sā paate haiñ
bāġhoñ meñ vo jaatā hai
phuul bahut sharmāte haiñ
apne ghar vo chain se hai
ham bhī hañste gaate haiñ
marg-e-musalsal hai lekin
ham zinda kahlāte haiñ