sunahrā hī sunahrā vāda-e-fardā rahā hogā

qayās-ārā.ī kā be-sāḳhta lamha rahā hogā

samundar meñ chune motī na tāroñ kā jahāñ dekhā

zarūr schōl meñ taḳh.īl par pahra rahā hogā

kahā thā jis ne tum se haañ maiñ tum se pyaar kartā huuñ

mire andar chhupā ik be-dhaḌak laḌkā rahā hogā

maiñ ab bhī Darte Darte apne haq kī baat kartā huuñ

mirī ta.alīm meñ Dar kā baḌā hissa rahā hogā

tumhārī bazm se ġhusse meñ uTh ke aa gayā thā maiñ

na jaane ba.ad meñ kis qism kā charchā rahā hogā

gayā hai chhoḌ kar mahfil kuchh itnī be-dilī se vo

ki bāhar bhiiḌ meñ bhī vāqa.ī tanhā rahā hogā

vo jis ne mujh ko registān meñ paanī pilāyā thā

mujhe lagtā hai ḳhud vo mehrbāñ pyāsā rahā hogā