kuchh aur nazar aate ḳhud se jo Dare hote

saa.e meñ kahīñ hote kuchh zaḳhm bhare hote

duniyā kā jo bas chaltā rakh detī kuchal kar hī

phir ye bhī haqīqat hai ham kitnā pare hote

lagtīñ na kisī ko bhī bāteñ ye burī apnī

do-chār jo ham aaise kuchh aur khare hote

andar se sabhī shāyad āvāz ke ghāyal haiñ

āvāz na dete to kyuuñ zaḳhm hare hote

ho koī bhī ham sab kā muñh band na kar dete

ilzām agar sar pe ḳhud hī na dhare hote

kuchh dekh ke jī apnā hotā jo zarā bhī ḳhush

phir haath in ā.ankhoñ pe aaise na dhare hote

kuchh jānñe kī dhun hai kyā jānñā hai lekin

ma.alūm ye hotā to ḳhud se na pare hote

ye 'talḳh' kiyā kyā hai ḳhud se bhī ga.e tum to

marnā hī kisī par thā tum ḳhud pe mare hote