sabhī sadiyoñ ko mil kar sochnā hai
ki ik lamhe kā man kyoñ anmanā hai
tumhāre paas haiñ ilm-o-hunar sab
hamāre paas bas ik bachpanā hai
bachā kar tum use gullak meñ rakkho
hameñ to zindagī ko ḳharchanā hai
haiñ kuchh īmān tere khel meñ yā
tirā maqsad yahāñ bas jītnā hai
sivā is ke qayāmat aur kyā hai
ḳhudā.ī kā ḳhudā se sāmnā hai
zarā ye soch kar taqrīr karnā
tumhāre baad ham ko bolnā hai
chamak sūraj kī kam thoḌe huī hai
use ghere hue bādal ghanā hai
kisī din bhaaḌ ko vo phoḌ degā
jise kahte haiñ sab thothā chanā hai